مسافر

الشعور بالغربة، اممممممم كنت بحسب دايما إن قلبي جامد، كنت بحسب إني مش هزعل على الفراق، قبل ما أسافر ب 10 تيام بالظبط، بدأت غصب عني أسرح كتير، رغم إني استنيت السفر كتير وحلمت بيه أكتر بس اتمنيت إن يحصل حاجة توقف السفرية، لدرجة إن اتمنيت إن الجيش يقولي مش هتسافر لإحتمالية استدعائك وأنا رايح اجيب تصريح السفر، هسيب شغلي الحكومي لأن معنديش استعداد ان أضيع عمري في شيء مجهول ومفهوش ضمانه بسبب نوع العقد بتاعي مع المشيخه، وفي نفس الوقت وأنا بعمل الورق بدور على طريقه عشان أفضل في الوظيفة الحكومية رغم إني عارف مفيش أمل،شعور متناقض زاد قبح بشعور إني طماع بس يمكن دا الخوف من المجهول، البيت سعيد إن رايح على جوز أختي، قلت لنفسي مش متخيل إيه الحاجة اللي تخلي إنسان يسيب أهله عشان المادة، أقول لنفسي في حجات كتير هتقف لو مستفرتش الجواز/المستوي الإجتماعي المحترم/ والعيشة الكويسة/سعادة البيت أضحك وأقول وجوازي من أربعة، أنا طول بسمع إن السفر مر، وكنت بضحك على هبل اللي بيقول كدا، كنت مفكر إن اللي يرفض النعمة، عشان الأسرة والكلام ده مجرد شخص أهبل.

بدأت أكلم نفسي وأعرف إني أنا اللي كنت أهبل، الأسرة طلعت متتعوضش بمال قرون، هسيب الصاحب اللي بحس معاه إني أهبل أو بالأصح على طبيعتي مع إنه كان بيواجهني بهبلي بس دلقوتي تقبل الأمر الواقع، وجودك وسط ناس بيحبوك حتى لو كل يوم بتتخانق معاهم أمر ميحسش بيه إلا المفارق ومش قصدي الفراق برحله، الفراق انك رايح مكان متعرفش المدة اللي هتقعد فيه متعرفش إنك هترجع لهم على نعش ولا هترجع تلاقي حد منهم على نعش، بدأت وأنا ماشي في الشارع أخد نفس عميق، من أي مكان بمشي فيه، رحت للأماكن اللي كنت باكل فيها ديمًا، لدرجة إحساسي إني مأفور وعايش في الدور، سألت الناس إيه طعم السفر، حد يقولي انت عايز تكتئب وخلاث، مش عارف، بس صدقني هتعرف لما تكون ناوي على سفر، تعرفوا انا حسيت بإيه حسيت إني زي الطور الهايج اللي اتكتف ورايح السلخانة، ومش عارف إيه المكان اللي رايحه، هو حاسس بانتهاء مصيره، لكن مفيش أي دلاله على كدا غير ناس كتير حواليه، يبدأ يشك لم يكتفوه بالحبل عشان ويوقعوه على الأرض، ويتأكد لما السكينة تكون بتمر على رقبته، ساعتها بس يتأكد إنه رايح بدون رجعه.

سبونش بوب والشيطان وأنا وولاد إخواتي

ولاد اخواتي كانوا بيلعبوا لعبة حلوه امبارح: الشيطان والصلاة، اتنين بيصلوا واحد يجي جنب ودن المصلي الأول ويفضل يقوله اسبونش بوب اسبونش بوب يقوم سايب الصلاة وجاري عشان يتفرج علي كرتون اسبونش بوب، يروح للتاني يقوله: سبونش بوب سبونش بوب، يقوم المصلي التاني يقول: [أعوذ بالله من الشيطان الرجيم] يقوم الشيطان المتمثل في بنت أخويا مصرخ ويفضل يتمرمغ علي الكنبة (بيتحرق يعني).

خفت أقولهم أني لسه مصلتش العشا لحد دلوقتي ليقولوا لي ((طب تعالى مثل دور الشيطان)).

امتحان الدين

فجأة إنقلب المعهد الديني رأسًا على العقب، المدرسين بيجروا، وشيخ المعهد متوتر، والعيال يبدو عليهم علامات الهلع والرعب لدرجة أن الرعب افترس كل ملامح وشوشهم البريئة فهذا أول امتحان لهم في حياتهم الدراسية، أخبر أحد المدرسين الشيخ إنهم مش لاقين مدرس يوحد ربنا يغشش العيال بتوع أولى الدين، ازداد توتر الشيخ وإزداد إفراز اللعاب من الغدد اللعابية، مع أن زيادة إفراز تلك المادة مرتبط بفتح الشهية أو طعام يطحن في ذلكم الخشم.

فإنجعص مدرس وقال بعلو صوته: أنا لها – أنا لها، والله يا مولانا محدش مغشش العيال التربية الدينية غيري وكان يقول كلمتي التربية الدينية بتقعر شديد وتفلحس لكي يدرك باقي المدرسون جهبزته في اللغة، فرد عليه مولانا: بارك الله فيك يا أستاذ حنفي، العيال في الدور التاني أول لجنة من جهة حمامات الصبيان الله ياخدهم، ونظر لحاشيته من المدرسين المنبطحين له: وقال وهو فاشخ ضبه – حنكه – شلاضيمه – بقه، العيال مش بتعمل بي بي في بيوت أهاليهم وتجي تقرف أهلنا هنا الله يخربيوت أهليهم مع عيالهم في يوم واحد، ضحك المدرسين لكلمات العلامة شيخ المعهد.

صعد المدرس السلالم جري، دخل الفصل دس نظره في ورقة الأسئلة، ثم أرفقها بنظره للتلاميذ وقال السؤال الأول سهل يا ولاد ميييييييين النبي بتاع المسلمين الرسول بتاعنا يعني إسمه إيه؟ نظر التلاميذ لبعضهم البعض فرفع أحدهم يده وقال بثقة: موسى صلى الله عليه وسلام، قال المدرس: اقعد يا بن الكلب، مين يله منك له النبي اللي نزل عليه القرآن، قال أحدهم وهو يتوجس خيفة: عيسى يا أستاذ، كاد الإستاذ أن يصدر صوتًا إعتراضيًا من منخاره وآخر حلقه للصبيه، فسبقه صوت من منتصف الفصل: محمد صلى الله عليه وسلم، صرخ المدرس وقاله أيوه يا بني كنت فين إنت من زمااااان، سقفوا له يا ولاد الكلب.

السؤال التاني يا ولاد: أركان الإسلام الخمسة ماشي الخامسة واخدين بالكم من الخامسة عددهم كااااااااام؟ لم يجيب أحد عن ذلك السؤال؟ صعق المدرس لكن إضطر أن يجيب على كل الأسئلة وتعمد أن يخطأ في نقطتان حتى لا توصم المدرسة بالغش فالغش فنون ولكي تكون فنانًا لابد أن تتقن فنك، بعد فترة ظهرت النتيجة بنجاح جميع طلاب الصف الأول وانتقالهم للصف الثاني بجدارة، فرح شيخ المعهد وهنأ التلاميذ وهنأ المدرسون شيخ المعهد، وقعد مولانا على كرسيه بعنطزه وهو يصرخ: أحمدك يا رب، ألف شكر وألف حمد لك، ثم صمت وأتبع صمته بابتسامه لم أستطع تفسيرها.

في عيد الأضحى اللي فات أه والله

النهاردة كنا رايحين ندبح لواحد صاحب أبويا المهم رحنا المزرعة رفعنا العجل المذكور ربطه العمال العربية اتحركت وعلى باب المزرعة واحنا ركبين في الكبينة بتاع عربية أخويا الجديدة الشيفروليه هوووووووب لقينا العجل طاير من فوقنا على سقف الكبينة فطبقها ثم على الإزاز فشرخه ثم على مقدمة العربية فأصابها بكدمة.

صدمنا الحادث لأن العربية لم تكمل الشهر وهذا ثالث حادث تبتلى به، المهم رجعنا ربطناه حلو وحطناه على العربية من تاني العربية وإحنا كلنا مقفولين إزاي هنقول لأخويا الخبر، رحنا المكان اللي هندبح فيه دبحنا، سلخنا، شفينا، وقبل نهاية تشفية العظم (عملية فصل العضم عن اللحم إسمها تشفية) السطور وقع جنب رجل أبويا، وكان أن يفقده كااام صوباع من صوباعه، طلب مني أحد أصحاب الأضحية تكسير العضم.

بدأت بالتكسير ثم اذا بالساطور يرتد من على الماسورة (اسم  عضمة الفخد) على يدي ليحدث جرح بإصبعين، ثم يقطع ابن عمى جلد ظهر كفه، ثم تكسر كبرى سكاكين أبي التي يسخدمها في التقطيع.

بدأت أقلق من اليوم الغريب ده، كله حوادث وبُحت للموجودين بمكنوناتي الدخلية، فابتسم الوالد وقال: (لو كان العجل نط قدام العربية واحنا مشين على الطريق في أحسن الأحوال كنا اتقلبنا بالعربية إن لم نكن متنا، ولاحظ ان الإزاز ممكن يتغير والسقف هيترد على البارد بدون سمكرة وكمان العجل لم طار ملطش الكبوت) أومأت رأسي إيمانًا بتلك النظرية التفائلية للأمور وجدت أن فعلا كنا سنموت لو نط العجل قدام العربية وبالمثل الساطور لم ينزل على رجل أبي بل نزل بجوراها وأنا الساطور الذي كنت أستخدم ارتد ولو كان نزل مباشرة على يدى لكنت أبحث الآن على كام صوباع استبن (بدل يعني) وبالمثل سكينة أبي لو كانت نزلت على اليد كانت ستقطعها لا محالة اثناء تقطيع اللحم بها، وأما إصابة ابن العمومة فإنها لست بالكبيرة وإن كانت غائرة.

استخلصت من اليوم أن نظرة الإنسان ربما تجعل من المصيبة شكر للرحمة، ومن الكفر إيمان، تذكرت أنني صليت الفجر ولم أكن أصليه في وقته منذ فترة طويلة فذكرت حديث رسول الله ((مَن صَلَّى الصُّبحَ فَهُوَ فِي ذِمَّةِ اللَّهِ)) كما أننى آمنت أننا لو نظرنا لمصائبنا بطريقة مختلفة، سنجد أنها رحمة وليست نقمة.

اه نسيت أقولكم أخويا عرف إزاي: ابن عمتى راح قاله: محمود العجل نط عالعربية بتاعتك؟ فضحك أخي لأنه ظن أنها دعابة إباحية، وضحك ابن عمتي عندما أدرك أني أخي لم يستوعب بعد، فأقسم له أيمان تلاته إن العجل نط على فوق على كابينة العربية :) عشان نية أخويا بس.

آسف

أشياءك محفوظة بالحق

أقسم بالله أقول الحق ولا شيء غير الحق ، أبويااااااا ، أبويااااا عودني من صغرني علي عدم الكذب ، لدرجة إن ده أصبح مشكلة  في حياتي مش إني أكذب لالالالا ، أني أقول الحق بدون تميز ، دا خلاني ربما احمق في نظر البعض ، بس فعلا سبب ليا مشكلة ، إنا مش بعرف أجامل ، ولو جاملت ببقي مفضوح فضيحة أم شعور لما البلد عرفت إنها قرعااااا ، وأصبحت كلمة لكن أو بس فيه حاجة تنصف كلامي دائما ، تتبع أي جملة مفيدة أو غير مفيدة ، أديلكوا مثال افتراضي لناس افتراضين بافتراض انكم مش عارفين تتخيلوا مع إن التخيل دا شيء افتراضي ممتع نابع من إن فيه واحد بيقول حاجة وانت بتتخيلها يا مَعَلِمِي  .

احنا عندنا ماكينة طحين وماكينة رز واحدة تقولي الرز بيكسر ليه ؟ تلاقيني بقولها لتلت أسباب يا حجة : أولا رزك مش حلو ، تانيا المكنة مش مظبوطه تلاته انا شغلي مش كويس دا انا نازل النهاردة كدا الشغل تفاريحي . مع إني ممكن كنت أقولها هحاول اخليه سليم واشتغلها والرز يتبيض ( يتم فصل القشرة عن الحباية القشرة اللي بتغلف الحباية يقال لها " سرس " والحباية بعد التقشير يقال علي " رز أبيض " .

المهم تعرفوا بقي لو اخترتوني أبقي رئيس أقسم بالله لأقول الحق ولا شيء غير الحق ، يعني واحد يسألني ياريس ايه اخبار البلد ؟ أقوله البلد حلها فل وعال العال لكن احتمال يحصل فيها انهيار اقتصادي الشهر الجااااي ، مش قلت لكم إن أحسن شيء في الدنيا الحق ؟ السؤال اللولبي هو ليه فيه ناس بتزعل من الحق ?!

عزيزي المواطن عزيزتي المواطن إختارني أكون ريسكم لكن في حاجة هتلاقوا رؤساااا احسن مني مليووون مرة لأني عارف إن مصر ولاده ، وولادها رجالة بعض النظر عن جنسهم أو ديانتهم أو موقعهم علي الخريطة ومتزعلوش من الحق ، للحق يزعل منكم ، معلش هنظر عليك كمااان شوية يا اللي هتجي رئيس : شعبنا مش عايز حد يضلله شعبنا عايز حد يقوله الصدق والحق ويسيبه هوا يقرر وصدقني لأني رجل أقول الحق ولا شيء إلا الحق شعبنا " هيسامح " إلا إنه ينضحك عليه تاني ونُصحي ليك دي عشان لو عايز تِحَرْسْ علي قفاك وعلي أشيائك الأخري متفكرش تعمل بُرم ع الشعب  .

خناقاتي منوره حياتي

طبعا مشفتونيش وأنا في الخناقات ، تقولوا عليا وحش كاسر ، طور هايج طبعا كلمة طور هنا استعارة مكنية مش تشبيه ، المهم من صغري أصلا كنت بحب اعمل مشاكل مع الأطفال بس في أحلام اليقظة عشان عندي حلم إني أتخانق مع واحد وأضربه ضرب مبرح ، ورغم كدا كان كل مره أنا اللي بتفحت في الخناقة ، أضرب لكم أمثلة مرة وأنا في خمسه ابتدائي تقريبا اتخانقت مع عيل في تلاتة ابتدائي وفجأة لقيت الفصل كله هاجم عليا وقام واحد منهم راشش تراب في عيني وبعيد عنكم مبقتش شايف حد من اللي بيضربوني ، ومره اتخانقت مع توأم مبقتش عارف مين اللي بيضرب فيهم أصل هما شبه بعض ومش عارف أضرب مين مع إن اللتنين كانوا بيضربوا .

مرة رحت فرح في بلد بعيدة عن بلدنا وأنا عندي 8 سنين عملت مشكله مع أولاد البلد اللي في سني ، قام أيمن – اللي أنا ضيف عنده – قالهم يا جماعة دا ضيف عندي ومينفعش تضربوه لأنه في بلدنا ، العيال سكتت طبعا أنا قلت في بالي " نجدكم أيمن من تحت إيدي " ربنا يجبر بخاطرك يا أيمن – مش عايزني أأذي حد .

في الإعدادي كنت مش بحب أتخانق لأن العيال كانت بتتعلم أزاي يخبطوا الواحد بموس في وشه وأنا قلت علي جثتي ، إزاي أبقي ظابط طيار ( دا كان حلمي ساعتها ) وأنا واخدلي – بشله – بموس في وشي ، في الثانوي خفت أختبر قوتي الجباره عشان ممكن أكسر لعيل ضلع ولا حاجة قدام بنت هوا معجب بيها وأهز صورته ففضلت المشي جنب الحيط خصوصا الأمواس اطورت وبقت مطاوي قرن غزال .

النهارده راجع من الشغل مشي لأن السواقين قفلين الطريق ومانعين عربيات الركاب لأنهم عايزين يغلوا الأجرة ، طبعا كرامتي نأحت عليا وقلت " أمشيها أحسن وكلها 5 كم يا معلم " وبعد أنا قطعت تلت المسافة أجد عجوز ماسك في خناق اتنين وبيستنجد بالمارة من السيارات والموتسيكلات والتكاتك " وقفت لقيت شابين نزلوا قالهم " سرقوا مني 70 جنية " الشابين لقيتهم نزلوا ضرب في الراجلين وفجأة الطريق الفاضي بقي مليان ومتعرفوش السكاكين طلعت منين والمطاوي ، فأنا بقول يا جماعة متضربوهمش إحنا نسلمهم لقيت واحد من الشابين قالي " إنت شكلك معاهم " شاورت له " كمل ضرب يا معلم " اتصلت بالنجدة ردوا والخط قطع ، عملت فيها حكيم وقعدت أطالب بتسلمهم للشرطة أو الجيش .

بس الصراحة الرجالة كانوا خدوا كام خبطه بالمطاوة علي كام قلم علي كام شلوت علي كام بوكس ، صراحة محستش جهتهم بأي شفقة خصوصا لما لقيت صدر واحد منهم مليان وشوم لما واحد من الشباب شدهم من هدومهم وعرفت من الشباب بعد كدا إن ده مسجل خطر ، بس إستغربت إزاي بني أدم يعور بني آدم بسلاح بدون احساس بأي ندم وبالعكس باستمتاع وسادية وشعور بالبطولة ، ركبوهم في عربية نقل وعرفت إنهم هياخدهم في ورشة " هيوجبوا معاهم " ويسلموهم قلت في عقل بالي " أكتر من كدا " خصوصا إن أحد الشباب قعد يخبط إيد واحد منهم بمطواه بطريقة غبية .

حكيت لأبويا قالي " كويس ، المفروض يعدموهم العافية إن شاء الله لو اتقتلوا حتي " قلت له " أومال فين الإنسانية " قالي " والراجل الكبير اللي ثبتوه و خدوا منه الفلوس وفي ظل الظروف البلد بتمر بيها المفروض يعدموا أي حد يرتكب جريمة وهوا في غني عنها "

هنا أدركت أننا لن نصبح متحضرين إلا عندما نبدل الهمجية بالعقل اللي الحكمة تكون هيا الأستاذه بتاعته ، وأيضا عندما تكون الأخلاق الإنسانية " متمثلة في الدين " هي ضميرنا الحي وضمرنا النائم .

افتكرت آيه ربنا قال فيها {مِنْ أَجْلِ ذَلِكَ كَتَبْنَا عَلَى بَنِي إِسْرَائِيلَ أَنَّهُ مَن قَتَلَ نَفْسًا بِغَيْرِ نَفْسٍ أَوْ فَسَادٍ فِي الأَرْضِ فَكَأَنَّمَا قَتَلَ النَّاسَ جَمِيعًا وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا وَلَقَدْ جَاء تْهُمْ رُسُلُنَا بِالبَيِّنَاتِ ثُمَّ إِنَّ كَثِيرًا مِّنْهُم بَعْدَ ذَلِكَ فِي الأَرْضِ لَمُسْرِفُونَ} (32) سورة المائدة . ياتري امتي هنكون كلنا أصحاب قلب وضمير وامتي هتكون فطرتنا السليمة هيا اللي بتحركنا ؟

وفي النهاية : متخلونيش أتنرفز علي واحد منكم واتعصب عليه انتوا عارفين إني طور قصدي مفتري يعني .